சென்னை உள்ளிட்ட 9 மாவட்டங்களில் சங்கமம் கலைத் திருவிழா: நாட்டுப்புற கலைஞர்கள் பதிவு செய்துகொள்ள அழைப்பு | Sangamam Art Festival in 9 districts including Chennai

சென்னை: சென்னை, காஞ்சிபுரம், மதுரை, திருச்சி உள்ளிட்ட 9 மாவட்டங்களில் நடத்தப்படும் சங்கமம் கலை விழாவில் பங்கேற்க விரும்பும் நாட்டுப்புற கலைஞர்கள் வரும் அக். 6-ம் தேதிக்குள் பதிவு செய்யலாம் என அறிவிக்கப்பட்டு உள்ளது.

இதுகுறித்து கலை பண்பாட்டுத்துறை வெளியிட்ட செய்திக் குறிப்பு:

கடந்த 2022-23-ம் நிதி யாண்டில் சென்னையில் பொங்கல் விழாவையொட்டி 4 நாட்கள், 18 இடங்களில் ‘சென்னை சங்கமம்- நம்ம ஊரு திருவிழா’ நடைபெற் றது. இது, அனைத்து தரப்பு மக்களின் வரவேற்பை பெற்றதால், இந்த ஆண்டு தமிழக பட்ஜெட்டில் ‘சங்கமம் கலை விழா’ சென்னை மற்றும் 8 முக்கிய நகரங்களுக்கு விரிவுபடுத்தப்படும் என்று அறிவிக்கப்பட்டது.

இதையடுத்து, ‘சங்கமம்-நம்ம ஊரு திருவிழா’ என்ற பெயரில் கோயம்புத்தூர், தஞ்சாவூர், வேலூர், சேலம், திருநெல்வேலி, காஞ்சிபுரம், மதுரை மற்றும் திருச்சி ராப்பள்ளி ஆகிய இடங்களில் நாட்டுப்புறக் கலை விழாக்கள் அக்டோபர், டிசம்பர் மாதங்களில் முதற்கட்டமாக நடத்தப்படும். இக் கலைவிழா வாயிலாக 3 ஆயிரம் நாட்டுப்புறக் கலைஞர்கள் பயன்பெறுவர்.

அதனைத் தொடர்ந்து சென்னையில், அடுத்தாண்டு ஜனவரி பொங்கல் பண்டிகையின்போது பிரம்மாண்டமாக ‘சங்கமம்-நம்ம ஊரு திருவிழா’ பல்வேறு இடங்களில் நடத்தப்படவுள்ளது. இக்கலை விழாவின் வாயிலாக 2 ஆயிரத்துக்கும் மேற்பட்ட கலைஞர்கள் பயன்பெறுவர்.

அக்.6-க்குள் அனுப்ப வேண்டும்: ‘சங்கமம்-நம்ம ஊரு திருவிழா’வில் பங்குபெற விரும்பும் கலைக் குழுக்கள் தங்கள் கலைத்திறமையை வெளிப்படுத்தும் வகையில் 5 நிமிட வீடியோவை குறுந்தகடு அல்லது பென் டிரைவ்-ல் பதிவு செய்து, அத்துடன் கலை பண்பாட்டுத் துறையின் www.artandculture.tn.gov.in என்ற இணையதளத்தில் வெளியிடப்பட்டுள்ள விண்ணப் பத்தை பதிவிறக்கம் செய்து, முழுமையாக பூர்த்தி செய்து, தொடர்புடைய கலை பண்பாட்டுத்துறையின் மண்டல கலைபண்பாட்டு மைய அலுவலகங்களுக்கு வரும் அக். 6-ம் தேதிக்குள் பதிவுத் தபாலில் அனுப்ப வேண்டும்.

கலை பண்பாட்டுத்துறையால் அமைக்கப்படும் தேர்வுக் குழுவால் தகுதியான கலைஞர்கள் தேர்வு செய்யப்பட்டு, ‘நம்ம ஊருதிருவிழா’வின் கலை நிகழ்ச்சிகளில் பங்கேற்க வாய்ப்புகள் அளிக்கப்படும். இவ்வாறு அதில் கூறப்பட்டுள்ளது.